Hermann Róbond 001 er leyniþjónustumaður Intellecta.
Leyniþjónustumaður í þeim skilningi að hann starfar í leyni við að þjónusta og létta undir með samstarfsaðilum Intellecta. Hann er með doktorsgráðu í herminámi og meistaragráðu í hjálpsemi.
Róbónd sérhæfir sig í endurteknum verkefnum, eins og gagnaöflun, gagnahreinsun, skýrslugerð, bókun reikninga og villuprófunum. Verkefnin sem hann tekur að sér eru stöðluð og síendurtekin, eins og til dæmis að taka á móti reikningum og skrá inn í bókhaldskerfi. Hann tekur einnig að sér tímafrek verkefni eins og að sækja upplýsingar af vefsíðum, skrá þær niður, vinna úr þeim og útbúa skýrslur með helstu upplýsingum. Þessi verkefni geta verið tímafrek og mikil handavinna en vefjast ekki fyrir Róbond sem veit fátt betra en endurtekningar.
Eitt dæmi um slíkt verkefni er þegar Hermann tók að sér verkefni í upplýsingaöflun sem hafði tekið starfsmann 40 vinnustundir að klára en tók Hermann aðeins 5 klukkustundir. Hann er því mjög hraðvirkur og vinnusamur en um leið vandvirkur og fullkomlega sjálfvirkur. Hann getur unnið á öllum tímum sólarhringsins og mætir um leið og kallið kemur.